የአዲስ አበባ ከተማ አስተዳደር ትምህርት ቢሮ በየደረጃው በሚገኙ የትምህርት ተቋማት ምዘና በማካሄድ ላይ መሆኑ ተገለጸ።

---

(ሀምሌ 24/2016 ዓ.ም) ምዘናው የተቋማቱን የ2016 ዓ.ም የቁልፍ ውጤት እቅድ አፈጻጸም ጨምሮ የአገልግሎት አሰጣጥ ፣ የብልሹ አሰራር እና  ቅንጅታዊ አሰራር አፈጻጸምን መሰረት አድርጎ በመካሄድ ላይ የሚገኝ ሲሆን ቀደም ብሎ ምዘናውን ለሚያካሂዱ ባለሙያዎች በምዘናው አካሄድና በመመዘኛ መስፈርቱ ዙሪያ ኦረንቴሽን መሰጠቱ ይታወቃል።

የአዲስ አበባ ከተማ አስተዳደር ትምህርት ቢሮ የእቅድና በጀት ዳይሬክቶሬት ዳይሬክተር አቶ ጌታሁን ለማ ምዘናው ከትላንት ጀምሮ በ11 የክፍለ ከተማ እና በ119 ወረዳ ትምህርት ጽህፈት ቤቶች እንዲሁም በ78 የመንግስት ሁለተኛ ደረጃ ትምህርት ቤቶች መካሄዱን ገልጸው ምዘናው በነገው እለትም ቀጥሎ በ255 የመንግስት አንደኛ ደረጃ ትምህርት ቤቶች እንደሚካሄድ አስታውቀዋል።

ዳይሬክተሩ አያይዘውም ምዘናው በዋናነት በተቋማቱ መካከል ተቀራራቢ አፈጻጸም ተመዝግቦ የትምህርት ልማት ስራውን ውጤታማ ለማድረግ ታስቦ የሚካሄድ መሆኑን ጠቁመው በቀጣይ የምዘናውን ውጤት መሰረት በማድረግ አፈጻጸማቸው ከፍተኛ ለሆነ ተቋማት እውቅና የሚሰጥ መሆኑን አስረድተዋል።

.